7 класс Диктант
Хуьруьн ким
Ким хуьруьн абур я. Ким авай хуьре гъвечIи-чIехид, хатур-гьуьрмет, хийир-берекатни ава. Ким авай чкада агъсакъал ава, агъсакъал аватIа, эл ава.
Са вахтунда хуьруьнвийри жемятдик къалабулух кутазвай вири месэлаяр кимел гьялдай. Гьи магьледа, гьи хизанда къал аватIа, гьихьтин гьуьжетунар арадал атанватIа, ни гьахъсузвилихъ, мидявилихъ ялзаватIа , кимел алай агъсакъалриз аян жедай. Абуру инал гьахълуни гьахъсузди чара ийидай, къал секинардай. Виликдай дявейрин вилик пад кьун патал кимел акъудай са къарар бес жедай. Им акI лагьай чIал тир хьи, кимел вирибуру гьуьрметзавай акьуллу ксар алай. Садахъни кимел акъудай къарар чIурдай ихтияр авачир.
Анжах девир дегиш хьунивай и хъсан адет арадай акъатиз башламишна. Хуьре ким авайди, агъсакъалрал меслят гъун герек тирди садбуру михьиз рикIелай алудна. Гьа идалди гзаф хуьрерин хийир-берекатни квахьна. (Седакъет Керимова)
